استفسار ..

[kingdom999]

السلام عليكم ورحمة الله وبركاته ..

كيف الحال ؟


أخواني انا حاب استشيركم في قضيتي اللي شاغلتني ..
وهي /

في يوم من الآيام الوالدة الله يحفظها هي واختي راحو لعند جدتي وجدي من جهة أمي .. يعني خوالي !
المهم صارت لي أمي مشكلة مع خالي وتدخلت اختي ولو ان جدي موجود وقام طرد خالي ..

بعد ما رجعوا أهلي إلى البيت اتصل خالي على أختي <
طبعاً أختي محد يعرف رقمها .. الا صاحبتها واقاربنا البنات فقط ..

المهم فرديت على التلفون انا ..
وصارت بيني وبين خالي مشادة بالكلام .. وسبيته وقلت له كلآم انا الحين تحسفت اني قلته ..
بعد ما قفلت التلفون .. اتصل مرة ثانية وكان الوالد موجود .. فقام أبوي وأخذ التلفون ورد عليه وتكلم معاه .. وقال له لا عاد تدق ومن ذا الكلام يعني ..
رد عليه خالي أنه مسجل المكالمة وراح يشتكيني أنا للشرطة عشان انا أتهمته انه ***** .. < كلمة وصخة اترفع عن ذكرها هنا بالمنتدى .. وما قلتها انا الا في لحظة غضب وندمان عليها .!

حاولو اقاربنا يصلحون ..
لكن جا اخوه الكبير .. خالي الكبير ..
وقال انا بصلح بينكم .. لكن شرط انكم تقبلون بحكمي ..
قاله الوالد وش الحكم .. قال 20 ألف + 4 خرفان !

المهم الوالد الله يحفظه ويخليه .. عنده السكر و الضغط .. اول ما سمع الكلام قاله الله يستر عليك وحكمكم ماقبلناه .. وروحو للمحكمة اشتكو ..

السؤال الحين ..!
انا ما دقيت على خالي .. هو دق على اختي ( والظاهر انه كان يبي يسوي لها فضيحة ) لأنه سجل المكالمة من اول ما رديت ..
طبعاً خالي هذا حقود و دايماً يسوي مشاكل ..

الحين لو اشتكى للمحكمة هل يثبت عليّ التسجيل ؟
+ لو أثبت التسجيل واني قلت الكلام هذا .. فيه أمل اني اوكل محامي ويترافع بدالي في القضية ؟ لأنه استفزني + تعدى على اختى وحاول ضربها وتلفظ علي وعلى اخواني و اتهمنا بأن راح نصير خريج سجون.. علماً بأننا متفوقين في الدراسة ولله الحمد .. وأخوي الكبير ضابط واللي اصغر منه مدرس .. وأنا اللي بعدهم وادرس بالجامعة .. يعني عائلتي ولله الحمد لها مكانة اجتماعية عاليه بين القبيلة .. وهالشي خلاه يدور على المشاكل بيننا وبينه .. طبعاً هي صارت مشاكل قبل هذي وكثيرة .. وكان دايماً يغلط علينا لكن الوالد يرفض اننا نتكلم او نقول شي .. وهالمرة الوحيدة اللي انا تكلمت فيها وصار اللي صار ..


آتمنى تعطوني الجواب الكافي الشافي .. وتريحوني من هذا الهم ..