أنا في حيره من أمري أفيدوني جزاكم الله خير الجزاء

[أبو سعييدد]

السلام عليكم ورحمة الله وبركاته

أخواني الله يسعدكم أنا بسرد لكم مشكلتي بأختصار

أنا الله بلاني بأبو زوجتي حيث أنه رجل تاجر ومليونير لكنه بخيل جدا

المهم أنا تزوجت قبل 6 سنوات وأنا كنت عاطل عن العمل عندي ولدين والثالث بالطريق إن شاء الله
فقررت أنا وزوجتي أن نشتغل من البيت ونتساعد في أمورنا
أشتغلنا من البيت نبيع ونشتري عن طريق النت ووسائل التواصل الأجتماعي من مستلزمات نسائيه ومنزليه وإلى آخره
بعد كم شهر تعسكرت ودخلت الدوره وبعد تخرجي أكملنا شغلنا الخاص من البيت وكانت المبالغ تتحول لحساب زوجتي بحجة أن الزباين كلهم نساء
المهم بعد ماجمعنا مبلغ محترم قررنا نشتري أرض بفلوس التجاره وأخذ قرض عقاري من البنك وأبني البيت لأستقر وأعيش حياة هنيه مثلي مثل باقي البشر

تفاجأت بأبو زوجتي يجني البيت بعد ماعرف إننا قرننا نشتري الأرض يصيح ويخاصم أنت تنصب على البنت وحق البنت مالك فيه دخل وأنا أبوها والأرض تنكتب بأسمها هذا تعبها ومالك دخل فيه ولازم لما تشترون الأرض أكون أنا موجود معاكم وأشوف الأرض وأحكم عليها ماتلعبون كذا ومن كيفكم ولا أحد ياخذ شوري
والأبن وما يملك لأبيه ومن هالكلام الكثير أفرض أنك طلقتها أو تزوجت عليها تبي تقهرها في حياتها ( طبعا هو متزوج تسع مرات ويحسب الناس كلهم مثله ) طبعا هو فسرها أنه بعد ماتوظفت أنا مالي شغل بالتجارة وأنه شغل بنته وفلووسها وأنت لك راتبك
حاولت أتفاهم معاه بالتي هي أحسن وهو غير راضي والمشكله البنت خايفه من أبوها وسمعت كلامه والحين تقول أبغى الأرض بأسمي
أنا رفضت بحجة أنو شغلنا مع بعض وأتفقنا من قبل نشتغل عشان ناخذ أرض ونبني بيت العمر وأنه أنا اللي سمحت لك بالشغل من بيتي وساعدتك بالشغل وأن أبوك ليس له رأي في حياتي وحياتك وليس بوالي عليك ولا علي كيف الحين تبين تكوشين على كل شيء

الزبده الحين هل أبو زوجتي له دخل بأبنته وهي على ذمة رجل ؟
ومالحل في المشكله هذه وكيف أتخلص من عمي ومن لقافته ؟
وهل الأرض السكنيه تنكتب بأسم شخصين مثلا أسمي وأسم زوجتي ؟


أفيدوني أثابكم الله
علما إلى الآن وأنا ماسك نفسي وأعصابي وكنت بطرده من بيتي بس حنيت على زوجتي وعلى أولادي

[أبو سعييدد]

هل أستطيع أن أشتكيه في المحاكم بحجة تدخله في أموري العائليه وتحريض زوجتي علي ؟

[راعي طلايب]

وعليكم السلام

مشكلتك هاذي ماتنحل في المحاكم.....تحلها بالعقل والحكمه والتخطيط.


اشور عليك انك تسكت.....وتخلي الأرض باسم زوجتك....وبعد فتره تطلب من زوجتك انها تفرغ لك نص الأرض.


في حالة ان الصك اخذه أبو زوجتك...تقدر تطلعون بدل فاقد وتفرغ لك النص.


في حال انها رفضت تفرغ لك اطلب منها تكتب لك ورقه وتقر فيه ان نص الأرض لك باعتبارك شريك في المبلغ الذي تم شراء الأرض فيه.


في حال رفضت....اعلم تماما ان المشكله من زوجتك وليس من والدها.

[أبو سعييدد]

بارك الله فيك
زوجتي كانت متفقه معي بكل شيء

بس لما قلب أبوها راسها قالت لا أبغى الأرض بأسمي

وإذا كانت الورقه تحل المشكله بسجل عليها ورقه وتقر فيها بس هل تعترف فيها المحكمه في حالة المشاكل ؟

وهل يسجل الصك بأسم شخصين أو لا ؟

[راعي طلايب]

...................

[راعي طلايب]

نعم الصك يسجل باسم شخصين او ثلاثه او اكثر....ويكتب فيه مشاع ولكل منهما النصف.


الورقه تنفعك في حالة الانكار مستقبلا وتضمن حقك ....ولكن لابد ان يكون اقراراها كالاتي وبخط يدها :


اقر انا - الاسم رباعي + رقم بطاقه الأحوال - وانا بحالتي المعتبره شرعا وبكامل قواي العقليه ان الأرض الواقعه في حي كذا مخطط كذا ورقم القطعه كذا بصك رقم كذا وتاريخ كذا ان نصفها لزوجي -الاسم رباعي + رقم بطاقة احوالك -

ويملك نصف الأرض وانني استلمت منه نصف القيمه مبلغ وقدره كذا (تضع نصف قيمة الأرض التي سجلت في الصك ) وجرى الاستلام نقدا...واتعهد بعدم بيعها ولا التصرف فيها الا بالرجوع له واخذ موافقته...واتعهد انني اعطيه نصف القيمه في

حالة بيعها بدون اذنه ...وهذا إقرار مني بذلك وقد انتفى لدي الجهاله والغرر...وقد اذنت لمن يشهد والله خير الشاهدين......الاسم...........الت� �ـــوقـــيع........التاريخ....... ..البصمه ( ان وجدت افضل)

وتكون البصمه بالابهام الايسر فقط.

[راعي طلايب]

اذا حبيت تطمئن اكثر....دعها تذهب للبنك الذي حسابها فيه....وتوقع نفس توقيعها في البنك....والبنك يصادق على صحة توقيعها.


الله ييسر امرك....ويجمع بينكما بالموده والرحمه

[ناايف]

الله يعينك

ارى ان تسجل الارض باسمكما معا او لاتشترك معها بالارض وخذ مالك وخلها تاخذ مالها ومالك ومال وجع الراس

[عرفات تركى]

لا اعلم كيف وصل العلم لابو زوجتك بما تنوى فعله
عامه قوم بشراء الارض انت وزوجتك باسمكم
وما عليك فيه يخبط راسه بالجدار