تورطنا مع اهل العمارة

[برغش]

السلام عليكم ورحمة الله وبركاته
اخواني الاعزاء
انا شخص استاجرت عمارة صغيرة مكونة من شقتين وملحق صغير في السطح
سكنت انا وعائلتي في شقة
واخي وعائلته في شقة
واثنين من اخوتي يدرسوا في الثانوية حطيناهم في الملحق الي في السطح
وكنت ادفع ايجار 30 الف
12 الف لكل شقة
6 الاف للملحق

سكنت من عام 2008 يعني قبل 13 سنة
العمارة قديمة ومرممة ترميم تجاري سئ جدا
ومع ذلك كنت اغير في الشقق انا واخواني من جيوبنا ولاعمرنا حاسبنا صاحب العمارة ابدا لانه رجال طيب وكنا اذا تاخرنا شهر مثلا يصبر ولايتكلم

اول ماسكنت سوينا عقد مع مكتب
وبعدها خلاص صار راعي العمارة يمر كل ستة شهور ياخذ الايجار مني يدوي
مرة يعطيني سند ومرات كثير مايعطيني

بعد اربع سنوات كلمته ان الايجار غالي واني حصلت افضل وبطلع قال لي لا لاتطلع ونقص الايجار الى
10 الاف لكل شقة والملحق 3000
يعني 23 الف
واستمريت معاه

بعد سنتين اخواني الصغار طلعوا لانهم تخرجوا وواحد تزوج وراح لشقة لحاله
كلمت راعي البيت ان الملحق صار فاضي
قال خلاص ادفعوا الي عليكم 20 الف قيمة ايجار الشقق


في اخر 3 سنوات
المالك سلم ادارة العمارة لمكتب يشتغل فيه شخص مقيم للاسف كلمة نصاب قليلة عليه
راح جاب ناس عزاب من جماعته عددهم 10 يبغى يسكنهم في الملحق مع العلم العمارة مدخلها واحد فقط
انا كلمت راعي العمارة وقلت له الملحق تبغى تجيب في عائلة اهلا وسهلا مع ان مافيه اي عائلة بتوافق تسكن فيه لانه غرفتين ودورة مياة ومفتوح على السطح يعني من المجنون الي حيجيب زوجته ويقبل يطلع ويتركها في ملحق مكشوف
المهم طردت المقيم هذا هو وجماعته وراح يشتكي لصاحب العمارة وقال له هذا حاجز الملحق على الفاضي ومخسرك فلوس
لكن راعي العمارة رجل اجودي ويعرف الاصول وقال له جيب عائلة اما عزاب لا
ومن بعدها المقيم هذا حقد علي
وصار يعبي راس صاحب العمارة هذا بيضحك عليك ومستفيد من الملحق بدون ايجار
المهم
انا كنت اسدد المكتب الايجار واخذ ايصال من تقريبا 3 سنوات

قبل سنة راعي العمارة توفى الله يرحمه ويغفر له
واستلم الادارة ولده الكبير وهذا شخص استغلالي يعبد المال عبادة
جلس مع المقيم صاحب المكتب وجلس يقول له ابوك كان طيب واتهمني اني كنت مانع الاستفادة من الملحق وعبى راسه كلام

انا وقتها كنت مسافر لمدينة ثانية
جاء الوريث وحصل اخوي وشد معاه بالكلام
يقول ابغى ادخل الان اشيك على الشقق
فال له اخوي تفضل تبغى تشوف الملحق فاضي اطلع للسطح لكن شققنا صغيرة وعوائلنا داخل كيف تدخل تشوفها ؟
راح فوق شاف الملحق
ونزل زعلان
واخوي راضاه وقال له : اذا تحب ننسق يوم وتجي تشوف الشقق ابشر مع ان هذا ماهو من حقه طالما انا مستاجر

اخوي طفش من التعامل بعد موت صاحب العمارة وحصل له شقة والله اجدد واكبر وانظف وبنفس الايجار فطلع فورا
لتل باقي لي شهرين ومقرر اطلع
لان بعد خروج اخوي موظف المكتب النصاب راح جاب افارقة سكنهم تحت في شقة اخوي
ومخطط يجيب افارقة للملحق طبعا عوائل
لكن الظاهر انهم وضعهم مريب
حريم كثير يجوا عندهم ويشتغلوا في البيوت بطريقة غريبة واظن انهم مخالفين لان كل يوم اعداد كبيرة من الحريم تجي
هذا غير سيارات تجي تاخذ حريم وترجعهم
والوضع صار سئ ومقرر اطلع
كلمت المكتب اني راح اطلع
واتفاجا ان الوريث اتصل يقول لي عليك فلوس متاخرة حق سنوات للملحق وفرق ايجار
قلت له انا كلمت ابوك زمان ونقص لي الايجار وبلغته بان الملحق فاضي
المهم الرجال مصمم ان عندي مبلغ للملحق حق 5 سنوات
وفرق الايجار الاصلي المدون في اول عقد سويناه اول ماسكنت
قلت له : توكل على الله انت شخص لص

راح المحكمة اشتكى
وجلستنا خلال الاسبوع القادم
السؤال كيف اثبت ان ابوه عدل لي الايجار لان اتفاقنا كان بيننا فقط وقبل سنوات
وحتى الملحق انا كلمت المالك وقت ماتركوه اخواني
وتعديل الايجار كان شفوي وعلى اساسه كنت ادفع للمكتب قسط الايجار
لكن المقيم الي في المكتب نصاب وهو عارف كل شئ بس جالس يشيش الوريث ضدي ويقول هذا اكل حلالكم سنوات

انا شخص كنت اتعامل بثقة مع الاب واسلمه الايجارات والله شاهد وكثير ماكنت اخذ منه سند
والعقد ماعندي الا اول عقد سوناه بيننا اول ماسكنت وهو بالسعر القديم
وش الحل الله يعافيكم

[ابو محمد 2]

وعليكم السلام
= حيث أنه ليس لديك بينة بأن والدهم في حياته قد خفض الاجار وفقاً لما ذكرته في موضوعك فإن ناظر دعواكم في حال أصر الابن على إنكاره للتخفيض سيعرض عليك يمين الورثة وربما يكتفي بيمين وكيلهم الابن كونه الاكبر والمشرف على عمارة والده وسيحكم لهم بما يستقر في ذمتك بعد تدقيق الحساب ويظهر الفرق الذي لم تقم بدفعه. والله أعلم وأحكم.