كيف تتم المحاكمة

[فلكي]

السلام عليكم
بصراحة اول مرة يحصل لي موقف وادخل محكمة وجلسة واقابل قاضي .. المهم قضيتي اني كنت راكب مع واحد " كداد " يبي يوصلني من القصيم الى الرياض وانا ما اعرفه ، ويوم دخلنا الرياض وقفتنا الدوريات عند مدخل الرياض ، المهم فتشونا كلنا ولقوا مع صاحب السيارة حشيش ، المهم حولنا للمكافحة وجا محقق وحقق معنا وانا والله مالي دخل بهالسوالف ، المهم طلعوني بكفالة.وبعدين عرفت اانهم حولوا القضية للمحكمة .
انا ماعمري دخلت محكمة ولا ادري وشل راح يصير هناك ، احد من الاخوان الله يثيبه يشرح لي وش راح يصير ، يعيني بيجيبوني مكلبش ، ويحطوني في قفص اتهام ، هل بيحكم علي الشيخ على طول والا بيتكلم معي ، وشلون ارد عليه ، هل بيحضر محقق ويقعد يكيل لي الاتهامات واقاطعه ، وبعدين ممكن يحكم علي من اول 5 دقائق ، وصحيح انه يسالني بقبولي بالحكم والا لا؟ واذاحكم علي مثلا ، على طول يودوني السجن والا اقدر ارتب مواعيدي واخذ اجازة من شغلي .. والله ما ني عارف يا جماعة احد يشرح الله يجزاه خير .

[ابو محمد 2]

وعليكم السلام
1-الكداد اللي ركبت معه ليش ما قالهم الرجال هذا راكب بأجر توصيله للرياض؟
2- الكداد اطلق بالكفالة وإلا موقوف؟
3- في التحقيق وش قلت ؟
5- هل عملوا مواجهة بينك والكداد في نهاية التحقيق وماذا قال؟
.................................................. ................................
أجب عن الاسئلة وسنجيب على اسئلتك , وكن صريح الاجابه.

[قاصد كريم]

السلام عليكم اخي الفاضل .
اتمني ان تشرح بالضبط ما ذا حصل بينكم . الموضوع ايضا يهمني لتشابههة مع حاله عندي ، وكيف تم ايقافكم .
الله يفرج عن الجميع .

[فلكي]

وعليكم السلام جميعا يا ابو محمد و يا قاصد .. ابو محمد 2 : بالنسبة للرجال من يوم وقفونا الدوريات خذو كل واحد في سيارة للمكافحة ، ويوم وصلنا هناك حطوني في حجز جماعي والرجال في انفرادي ، ولا قابلتهمن عقبها ولا ادري وش قال . ويم جا المحقق الصباح شرحت له القصة ، وقلت له ان معي في شنطة اوراقي كعب البوردينج من مطار الرياض الى مطار القصيم ، وتذكرة العودة من مطارالقصيم الى الرياض على ثاني يوم ، بس لاني توفقت وخلصت اوراقي ومعاملتي في نفس اليوم وشو له اقعد ليلة كاملة وانا ما عندي شغل ، دلوني الاخوان هناك على موقف يتجمعون فيه السواقين ورحت وتقاطعت معه على 350ريال للرياض لحالي معه بالسيارة .وقلت للمحقق شف التذكرة حقت العودة من القصيم الى الرياض مؤكدة وما استخدمتها وحجزي على ثاني يوم وهي في شنطة اوراقي اللي خذوها المكافحة وحرزوها عندهم ، والاوراق اللي كنت اراجع فيها في الجهة الحكومية اللي في بريدة ، حتى عطوني تذكرة مراجعة بنفس تاريخ اللي انمسكت فيه .. يعني انا الرجال ما اعرفه ولا ادري وشهو من لحية .سواق من ضمن السووايق اللي يصفون ويصلون الناس . وبعدين الموقف هذا مليان ناس يعني ما وقفته عند اشارة ، انا اخذته من نقطة تجمع لهم معروفة عند كل اهل البلد .
اما من ناحية المواجهة لا والله ما واجهوني به ولا جمعوني معه لا المحقق ولا المكافحة ولا ادري وش قال لهم ولا ادري اذا اطلق والا ما اطلق ، لاننا جينا المكافحة بالليل ، وجا المحقق الصبح الساعة 10 ، والساعة 1الظهروانا طالع بكفالة .

[ابو محمد 2]

أجل ما دام هذي علومك فلا عليك خلاف . ولا تقلق..

[فلكي]

الله يجزاك خير ابو محمد ،لكن يشهد الله ان ركبي تصافق ، ولا ادري وش راح يصير معي بالمحكمة عند القاضي ، انا حدي اقابل شيخ افرغ ارض في كاتبة عدل او اسوي وكالة ، ما هوشيخ حق قضية قضية ويمكن احكم ويمكن لا، ومن زين هالبخت بعد قضية مخدرات .. الا والله الفشيلة .. ابي بس لو تكرمت اذا لك خبرة بهالامور تشرح لي وشلون اقابل الشيخ ، يعني بيجيبوني عن طريق الشرطة للمحكمة مكلبش والا البس عقالي والا اشيله ، وشلون احكي .. والله اني متلخبط ولا ادري ةش اللي يبي يحصل علي

[مرحبا999]

انت بتروح بنفسك للمحكمه اكيد معك موعد
او تابع رقم معاملتك من المكافحه الى هيئة التحقيق الى المحكمه
اطلب الشيخ اجراء تحليل مخدرات لكم الاثنين
واحلف يمين انك ماتعرفه
واطلب احضار جميع الاثباتات وكعوب البوردنق من المكافحه
واطلب تحضير السواق لاخذ اقواله
واطلب الشيخ اسم السواق او جواله كي تتفاهم معه او تحضيره بالجلسه الثانيه
لانه ممكن انه ورطك معه
وشدد على طلباتك
ومثل ماقالك ابو محمد امورك طيبه

[فلكي]

يا مرحبا 999 ابي ازودك واحد عشان تصير مرحبا 1000 على قولت اخواننا هل الجنوب .. لا والله يا خوك ما معي موعد ولا شي ، لكن ابي اروح اراجع بكرة بالمكافحة واشوف وش اللي صارعلي لاني ما اعرف المحقق ولا اعرف اسمه .. غدي يعطوني اسمه او رقم المعاملة اللي صدروها من عندهم .. هقوك انه ورطني معه هالخايس ؟ وهقوك يسمع لكلامي القاضي وللطلبات اللي اقترحت ؟ وهل احطها له بخطاب والا اذكرها له حكي ؟ والتحليل شلون اسويه ؟ اروح اسويه انا والا هم يحولوني ؟ الا والله على ما قال هذا اللي يبلاك بنفسه .. الله المستعان

[جميل السجايا]

السلام عليكم ورحمة الله وبركاته :
أولا : عليك بدعاء الله ( أمن يجيب المضطر إذا دعاه ) ( وقال ربكم ادعوني أستجب لكم ) ، فادع الله أن يثبت براءتك وييسر محاكمتك بالبراءة .
ثانيا : اذكر الله كثيرا ، واستغفر كثيرا ، وتب إليه ...
(لا إله إلا الله العظيم الحليم لا إله إلا الله رب العرش العظيم لا إله إلا الله رب السموات ورب الأرض رب العرش الكريم ) .
( أستغفر الله العظيم الذي لا إله إلا هو الحي القيوم وأتوب إليه )
واقرأ الآيات القرآنية ففيها يثبت القلب وتصفو الأفئدة ...وتتثبت في وقت الأزمات ...
( فاثبتوا )
ثالثا: وضح الصورة بأسلوب هاديء غير مرتبك حتى لا يشك بضلوعك معه أو تخادنك .
فوضحها للمحقق ، ثم وضحها للقاضي ...مبينا كل ما تستطيعه من إثبات ,,,وهي كالتالي :
1- إن كان رآك أشخاص وأنت تركب مع هذا الأجير فإن استطعت الإتيان بهم للشهادة فافعل .
2- الأوراق الثبوتية التي بحوزتك.
3- الحقيبة التي كانت معك .
4- عدم وجود صلة قرابة أو صلة عمل أو أي ارتباط مع السائق ...
5- عدم السوابق..
...ونحو ذلك مما لا يخفى ...
وفق الله الجميع ، وفرج كروبنا وكروبكم ...
أخيرا ...
فإن القضية ستحال إلى المحكمة بعد الانتهاء من التحقيق ومحاضره ، ومن ثم سيحدد موعدا عند القاضي ، وقد تطول المدة ...
واسأل ربك أن لا يرمي هذا السائق بالتهمة عليك ,.,,أو يعترف باستئثاره بالجريمة ....

[فلكي]

وعليكم السلام ورحمة الله وبركاته يا جميل وكل اللي مشاركين .. يا جميل نسأل الله ذو العزة والجلالة الثبات والحمدلله انك ذكرتني بان الله موجود ولا ينسى عبده ، وان شالله نثبت على طاعته وذكره لا اله الا هو سبحانه اني كنت من الظالمين . الحمدلله ما اذكر اني ظلمت احد او احد ادعا علي باني ظلمته او غشيت احد بعملي وسامحنا يا خوك تراني ما وصلت للتعليم اللي يخليني اصف الكلام المرتب لكن الحمدلله اني اخذت نصيبي من الدنيا وانا الحمدلله قانع وراضي والحمدلله ولكن هذي نقول انها ابتلا من الله عشان يمتحن الانسان ، والانسان يفعل السبب ويستشير هل الخبرة والراي في شي ما يعلمه وانتم مبين انكم اهل خبرة بهالمواضيع ، والا المراة هي اللي شارت علي اني اكتب عندكم واشوف شوركم ، وجزاك الله الف خير ولا خلا ولا عدم

[فهد الشهري]

انصا الاماره دايركت ولا عليك من احد خش على الوكيل تبع شؤون المواطنين اذا مافادوك بشي

[المحامي علي السعدون]

السلام عليكم
بصراحة اول مرة يحصل لي موقف وادخل محكمة وجلسة واقابل قاضي .. المهم قضيتي اني كنت راكب مع واحد " كداد " يبي يوصلني من القصيم الى الرياض وانا ما اعرفه ، ويوم دخلنا الرياض وقفتنا الدوريات عند مدخل الرياض ، المهم فتشونا كلنا ولقوا مع صاحب السيارة حشيش ، المهم حولنا للمكافحة وجا محقق وحقق معنا وانا والله مالي دخل بهالسوالف ، المهم طلعوني بكفالة.وبعدين عرفت اانهم حولوا القضية للمحكمة .
انا ماعمري دخلت محكمة ولا ادري وشل راح يصير هناك ، احد من الاخوان الله يثيبه يشرح لي وش راح يصير ، يعيني بيجيبوني مكلبش ، ويحطوني في قفص اتهام ، هل بيحكم علي الشيخ على طول والا بيتكلم معي ، وشلون ارد عليه ، هل بيحضر محقق ويقعد يكيل لي الاتهامات واقاطعه ، وبعدين ممكن يحكم علي من اول 5 دقائق ، وصحيح انه يسالني بقبولي بالحكم والا لا؟ واذاحكم علي مثلا ، على طول يودوني السجن والا اقدر ارتب مواعيدي واخذ اجازة من شغلي .. والله ما ني عارف يا جماعة احد يشرح الله يجزاه خير .

ابدً لايوجد قفص او مدعى عام لكن ستجد الناس وكأنهم في سوق قديم أهلكه الدهر وعسكري يقف على باب مغلق . وحالة فوضي تعج بالمكان هذا يشتكى بأنه مستاذن لساعة وذاك يشتكى بأن لإبنه موعد بالمستشفى وأخر يلح على العسكري أن يدخله على القاضي لإنه يخشى فوات رحلته وأخر يبحث عن جهاز تكييف يعمل ليجلس تحته وهناك أُناسٍ يجرونهم عسكر حالتهم رثة مكبلين بالسلاسل ليسوا ياخى الا متهمين فقط يجرونهم وهم لايشعرون أن الله جعل للأنسان كرامة ولايعلمون أنهم اسقطوا أهم مبأدى العدالة ((المتهم برئ حتى تثبت إدانته ))فلا تكلمهم فهم لايسمعون وانصحك أن تنشغل طوال هذا الساعات المملة بالبحث عن الدليل الذي يثبت أن ركوبك مع السائق كان بسبب عرضي ولغرض توصليك بأجر وأنه لايوجد صلة بينكم ذالك مبلغ جهدك بشرط أن تكون المادة المضبوطة بمكان يفسر عدم علاقتك بها فإن وفقك الله لذلك فأنت في مأمن من هذه القضية ... أطمئن

[ابو محمد 2]

ابدً لايوجد قفص او مدعى عام لكن ستجد الناس وكأنهم في سوق قديم أهلكه الدهر وعسكري يقف على باب مغلق . وحالة فوضي تعج بالمكان هذا يشتكى بأنه مستاذن لساعة وذاك يشتكى بأن لإبنه موعد بالمستشفى وأخر يلح على العسكري أن يدخله على القاضي لإنه يخشى فوات رحلته وأخر يبحث عن جهاز تكييف يعمل ليجلس تحته وهناك أُناسٍ يجرونهم عسكر حالتهم رثة مكبلين بالسلاسل ليسوا ياخى الا متهمين فقط يجرونهم وهم لايشعرون أن الله جعل للأنسان كرامة ولايعلمون أنهم اسقطوا أهم مبأدى العدالة ((المتهم برئ حتى تثبت إدانته ))فلا تكلمهم فهم لايسمعون وانصحك أن تنشغل طوال هذا الساعات المملة بالبحث عن الدليل الذي يثبت أن ركوبك مع السائق كان بسبب عرضي ولغرض توصليك بأجر وأنه لايوجد صلة بينكم ذالك مبلغ جهدك بشرط أن تكون المادة المضبوطة بمكان يفسر عدم علاقتك بها فإن وفقك الله لذلك فأنت في مأمن من هذه القضية ... أطمئن

أحسنت بارك الله فيك هذا وصف للحال وواقع لا ننكره ونحمد الله على كل حال ولعل أحفادنا ينالون حظ أوفر بتحقيق شيء مما ننشده ونتمناه .

[المحامي علي السعدون]

أحسنت بارك الله فيك هذا وصف للحال وواقع لا ننكره ونحمد الله على كل حال ولعل أحفادنا ينالون حظ أوفر بتحقيق شيء مما ننشده ونتمناه .
وفيك اخي

[مرحبا999]

خل السواق يثبت انه يعرفك او يعرف احد اقاربك
واسال القاضي ان كان يعرف ارقم جوالاتك وكم مره اتصل بك ولو تجيب برنت من الاتصالات عليه بطلب من البحث والتحري
واسال القاضي ان كان يعرف بيتك او سيارتك او اخوانك وكم مره جاء لبيتكم
وكيف معرفتك به بالضبط عن طريق من واحضره للشهاده
اما ان قال مافي شخص عرفني عليه فحجته ضعيفه
واسال القاضي عن اثبات السواق وشهوده
مع ماذكر بالرد السابق