انا وطليقي وطفلي

[أم بدر]

دكتور ناصر جزاك الله خير وجعل ماتقوم به في ميزان حسناتك ويرفع به درجاتك اتمنى ترد على سؤالي بكل رحابه صدر - طليقي رافع دعوه علي يطالب باخذ طفلي يوم في الاسبوع وطفلي عمره سنتان ومصاب بالصرع والحمدلله ماشي على العلاج ارسل مكتب الصلح خطاب للمستشفى وجاء الرد من دكتور الاطفال بان حالت الطفل مستقره بالعلاج والمفروض يرد دكتوره المختص بالاعصاب مو الاطفال لان دكتور الاعصاب يقولي بعد سنه بخفف له العلاج بالتدريج ولازم يكون تحت المراقبه برأيك هل سيحكم باخذه للزياره واقدر اطلب ارسال خطاب اخر لدكتور الاعصاب -مع العلم انا وطليقي في نفس المنطقه ورافض يجي يشوفه لانه يبغى ياخذه -ارجوك جاوبني ذبحني الخوف على ولدي-وهل اذا مانفذت حكم الشيخ ياخذون ولدي بالقوه -واتمنى من اصحاب الاختصاص يعطرون صفحتي بأراءهم -

[أم بدر]

معقوله مافي ولا رد_‏

[الراحل]

والله يالأخت الكريمه على حد علمي
ان الولد في حكم الشرع يقعد عند امه الى ان يبلغ السبع سنوات وبعد ما يبلغ هذا العمر
يخيره الشيخ بين ابيه وامه
فأيهما يختار فهو له
هذا حكم الشرع

وان شاء الله اهل الاختصاص يفيدونك اكثر

[أم بدر]

أشكر مرورك العطر أخي الراحل_

[أم بدر]

تكفووووون ردو علي الجلسه بعد يومين وخايفه وش تتوقعون يصير هل لطليقي ياخذ ولدي زيااااااره -

[صمت الجروووح]

القاضي يمكن يحكم له يوم بالأسبوع من الصباح للمساء والنوم ينام عندك الله لآيحرمني من ابني ولايحرمك من ابنك

[أم بدر]

لامااتوقع بيحكم له من الصباح للمساء ولدي تحت علاج التشنجات واي تاخير ترجع التشنجات بس انا اخاف يحكم يوم في الشهر وبعدين يصكون عليه ومايرجعونه ويصير انتكاس لحالته-يارب افرجها علي

[د. ناصر بن زيد بن داود]

مثل هذه السن لا ينبغي تمكين الأب من أخذه معه ومفارقة أمه ؛ فهو لا يزال في سن الرضاع ، وله أن يراه ، ويحمله ، ويشمه ، ويلاعبه في منزل أهل والدته ، أو في منزل قريبٍ مؤتمنٍ من الطرفين ساعةً أو ساعتين في الأسبوع لا أكثر .

[صمت الجروووح]

أنا قلت لك الحكم اللي حكم فيه القاضي لأبني هو يوم واحد بالأسبوع بس عشان ولدك تعبان يمكن الحكم يختلف اسأل الله ان يشفي ولدك وان يرزقك بره

[صمت الجروووح]

لامااتوقع بيحكم له من الصباح للمساء ولدي تحت علاج التشنجات واي تاخير ترجع التشنجات بس انا اخاف يحكم يوم في الشهر وبعدين يصكون عليه ومايرجعونه ويصير انتكاس لحالته-يارب افرجها علي
ياحياتي مو على كيفهم يصكون عليه ومايرجعونه انتي قولي للقاضي بكل شي وجيبي تقارير طبيه بحالته الصحيه والله يشفيه يارب

[أم بدر]

يارب وش هالمصيبه اللي حلت علي اليوم الجلسه وطليقي جاب ورقه من موضف في الملفات حق المستشفى اللي يتعالج فيه ولدي ان الولد ماله ملف عندنا واسمه مو موجود أصلا - والله بغيت اقوم اقتل الحقير طليقي وللعلم تاجلت القضيه كالعاده --

[ابو محمد 2]

دكتور ناصر جزاك الله خير وجعل ماتقوم به في ميزان حسناتك ويرفع به درجاتك اتمنى ترد على سؤالي بكل رحابه صدر - طليقي رافع دعوه علي يطالب باخذ طفلي يوم في الاسبوع وطفلي عمره سنتان ومصاب بالصرع والحمدلله ماشي على العلاج ارسل مكتب الصلح خطاب للمستشفى وجاء الرد من دكتور الاطفال بان حالت الطفل مستقره بالعلاج والمفروض يرد دكتوره المختص بالاعصاب مو الاطفال لان دكتور الاعصاب يقولي بعد سنه بخفف له العلاج بالتدريج ولازم يكون تحت المراقبه برأيك هل سيحكم باخذه للزياره واقدر اطلب ارسال خطاب اخر لدكتور الاعصاب -مع العلم انا وطليقي في نفس المنطقه ورافض يجي يشوفه لانه يبغى ياخذه -ارجوك جاوبني ذبحني الخوف على ولدي-وهل اذا مانفذت حكم الشيخ ياخذون ولدي بالقوه -واتمنى من اصحاب الاختصاص يعطرون صفحتي بأراءهم -

يا أم بدر بارك الله فيك وحفظ لك ولدك وشفاه.
تقدمي بطلب للمستشفى عن طريق مكتب التقارير الطبية , سجلي الطلب وسيواعدونك بعد اسبوع أو اسبوعين لاستلامه , وبعد ان تزويدينهم برقم ملفه اذكري أنه يتلقى العلاج لدى دكتور المخ والاعصاب واذكري اسمه , وإن شاء الله يكون التقرير معك في الجلسة القادمة , يبدو لي أن طليقك له من يحرف على غير الحقيقة في المستشفى , ولكن قومي بما ذكرت ولا تخبري أحد ولو من أقاربك بما عزمتي عليه تصرفي بكتمان حتى تستلمي التقرير الطبي موقع من استشاري المخ والاعصاب.
وستتغير الأمور لصالحك فالقاضي يحتاج إلى بينة قوية ليفصل في موضوعك وبينتك التقرير الطبي مختوم بختم المستشفى وفي هذه الحالة سيقفل باب التحايل والتلاعب في وجهه.
بالتوفيق أعنكم الله..

[أم بدر]

ياأبو محمد كيف مافكرت بهالموضوع جزاك الله خير -

[أم بدر]

دكتور ناصرجزاك الله خير-- انا مستحيل اخلي ولدي يبعد عني دقيقه حتى لو حكم بالزياره ماراح اخليهم ياخذوه حتى القاضي ماتحمس لموضوع طلعته من البيت-

[صمت الجروووح]

الله يشفي ولدك يارب ومايحرمك منه

[أم بدر]

صمت الجرووح ولايحرمك من ولدك يارب -ودي اسالك كم عمر ولدك يوم قرروا له زياره وهل انتي وافقتي على اخذه والله مااتخيل ولدي بعيد عني والله متعلقه فيه بشكل ماتتصورينه -

[صمت الجروووح]

آمييييييييييييييييييييييي يييييييييين
عمره 5سنوات وافقت عشان نفسيه ولدي وعشان يحس انه معاه أب لآنه حسآس واذا شاف أولآد أخواني يقعد يسأل ليه هم معهم بابا وانا لآ .ليه هم بابتم يشتري لهم وانا لآ صدقيني يوم رآح معه ورجع أحسه فرحآن مساكين أش ذنبهم الكبار يغلطوا والصغار يدفعوا الثمن
وعادي أخذه الصباح ورجعه الليل أتفقنا على كذا
اما عن التعلق والله حتى أنا متعلقه فيه وأمووووت فيه بس هذا القدر الله يعوضنا

[أم بدر]

اهاااا قولي خمس سنوات مشاءالله معتمد على حاله اجل وش تقولين على هالصغيرون اللي ماتجاوز سنتين تصدقين لو اروح السوق ساعه يبكي لحد ماارجع وحتى لو انوم شوي وهو صاحي يقعد يجر في شعري لحد مااصحى والله اتمنى اني مااحرمه من ابوه بس ابوه مخيرني ياخذه او ماراح يجي يشوفه كل خيار اصعب من الثاني مااقول الا الله يهدي ابو ولدي ويحنن قلبه على هالضعيف اللي ماله ذنب-

[صمت الجروووح]

الله يعينك