مشكلة اخوي جابت لي الضيق

[abo aziz]

السلام عليكم ورحمة الله وبركاته
كل عام وانتم بالف خير وخواتم مباركة والله يتقبل منا ومنكم صالح الاعمال

القصة الله يسلمكم
عندي اخ شاب عمره 27 سنة لكن للاسف يمشي مع ناس ضايعين وحقين مشاكل
قبل شهرين اتصل فيني رقم رديت عليه وقال لي معك محقق من نيابة منطقة في الجنوب قلت له مرحبا قال وين اخوك فلان قلت له ماعندي علم ليش قال اخوك نبغاه علشان قضية نصب واحتيال
انصدمت من كلامه وقلت له وش التفاصيل قال اذا تبي تعرف التفاصيل تعال لنا في النيابة قلت له ياابن الحلال انا وين و**** وين انا ساكن في الدمام
قال المهم بلغ اخوك لازم يراجعنا
اخوي يشهد الله ماادري وينه سمعت من امي انه راح ولقى وظيفة حارس امن في تبوك داخل مستشفى
جوالاته كلها مقفلة واتوقع انهم معممين عليه
قبل اسبوعين وصلني اتصال من رقم ثابت رديت وكلمني واحد يقول انه من شرطة نفس المنطقة وسالني عن اخوي
قلت له والله ماادري وينه ولاشفته لي سنة وانا صح اخوه بس عايش لحالي مع عائلتي ومااشوفه حتى بيت الوالد مايجيه
لكن الاخ بدا يهدد ويتوعد ويقول اخوك مسوي هو ومجموعة معه عملية نصب في بيع سيارات على موسسة وفيها لعب وتحايل وغش وصار يقول لي لازم تجيبه لنا وتتعاون معنا
قلت له يااخوي عمم عليه والا ابحثوا عنه قال لازم انت تجيبه وتتعاون معنا حاولت افهمه اني ماادري وينه ولاشفته لكن الاخ يكرر لازم تجيبه انت اخوه وانتهى الاتصال
الخميس الماضي وصلني اتصال من البحث في نفس المنطقة يقولون وين فلان ورجعت اعيد لهم الموضوع قالوا لي كيف ماتعرف وينه وطلبوا مني اني اراجعهم قلت له انا في الدمام وش بيجيبني منطقتكم قال لازم تحضر قلت له احضر ليش علمني بالتلفون لكنه مصمم اني احضر او بيتخذ اجراء
انا انسان عمري 50 سنة وابو عيال ويشهد الله اني في حالي وانسان مالي في المشاكل والمراجعات ومريض سكر وضغط وربو
انا لي ايام قلقان وماادري هل اروح لهم كل هالمشوار حوالي 1000 كيلو
واحيان اقول اخاف اروح لهم ويوقفوني علشان يجبرون اخوي يجي ويراجعهم مع ان اخوي والله لو يسجنوني سنة ماراح يجي
وناس يقولون مالهم حق اصلا يتصلون عليك الا اذا بيوصلون له خبر او يستفسرون اما يوقفونك او يلزمونك تجيبه هذه مالهم حق يسوونها
واخاف اني اطنشهم ويوقفون خدماتي او يعممون عني مع اني مالي اي علاقة
ومستغرب كيف جابوا رقمي لكن قلت يمكن لان اخوي سوا لي وكالة قبل 3 سنوات راجعت له في موضوع في النيابة عندنا مضاربة مع جار لنا ووقتها عبيت معلوماتي وقت ماطلبت اقابل المحقق
والله ياناس رمضان هذا مر علي وانا في هم بسبب هذا الولد الله يصلحه ارجوكم وجهوني وش اسوي